Повтӧм салдат

«Подвиг народа» сайт вылын гижöма «782 метра вылнаын немечьяскӧд тышын карабинӧн вит вӧрӧгӧс лыйӧмысь «За отвагу» медальöн пасйӧма Гöрд армияса салдат, лыйсьысь Иван Васильевич Кармановӧс». Тайӧ повтӧм мортыс чужліс 1926-ӧд вося январ 17-ӧд лунӧ Бадьёльйылын. Василий Игнатьевич батьыс вӧлі кузнечӧн. Мамсӧ шулісны Евдокия Ивановнаӧн.

Иван Васильевич нёль класс и помаліс. 14 арӧссянь уджаліс трактористӧн «Жданов» колхозын. 1943-ӧд воын 17 арӧсӧн босьтісны армияӧ. Война вылӧ мунтӧдз велӧдчис кык тӧлысь. Медводз веськаліс Украинаса коймӧд фронт вылӧ, вӧрӧгкӧд тышкасис Днепр дорын да мукӧдлаын. 1945-ӧд вося февраль 23-ӧд лунсянь май ӧкмысӧд лунӧдз дорйис Вена. Сэні и сетісны «За отвагу» медводдза медаль. Лыйсьысьяслӧн 195-ӧд гвардияын вӧлі пулемётчикӧн, сэсся 68-ӧд торъя ротаын лыйсьысьӧн, 203-ӧд торъя полкын отделениеса командирлы отсасьысьӧн. Иван Васильевичӧс пасйисны Отечественной войналӧн мӧд тшупӧда орденӧн, «За победу над Германией в Великой Отечественной войне 1941-1945 гг.», «30 лет Советской армии и флоту», «20 лет Победы над Германией в Великой Отечественной войне 1941-1945 гг.», «30 лет Победы над Германией в Великой Отечественной войне 1941-1945 гг.» да мукӧд юбилейнöй медальясӧн.

1950-ӧд воын бергӧдчис чужанінас. Уджаліс колхозын комбайн вылын. 1951-ӧд воын ӧтлаасис Иллария Николаевнакӧд. 1960-ӧд воын локтісны овны Діасёръяӧ. Лесопунктын вӧлі пӧрӧдчысьӧн, трактористӧн, сэсся пенсия вылӧ петтӧдз кузнечаліс гаражлӧн вӧчасянінын. Бур уджсӧ унаысь пасйылісны почёт грамотаӧн.

Кыпӧдіс керка. Пыр олісны скӧтӧн. Турун пуктыны ветлісны Югыдтыдорӧдз. Гозъялӧн нёль челядь. Галина уджаліс мастерӧн Помӧсдінса леспромхозын, Николай вӧлі механикӧн, коммунальнöй овмӧсын мастерӧн, Светлана бурдӧдысь, Нина стрӧитчысь.

Иван Васильевич куліс 1992-ӧд вося март коймӧд лунӧ.

Нина ШАТОХИНА,

олӧмаяслӧн Діасёръяса котырӧн юрнуӧдысь.

Парма гор, 2020, Январ 30 лун (5 №).